[A:231]lor/ go rams sher dpal gyis/ rab 'byams la sogs bshes gnyen brgya rtsa gcig /ces brgya 'bul gyi rnam grangs su mang du bkod pa'i dkyus kyi gtso bor byas te/ rong ston smra ba'i seng ge dgung lo brgyad cu rtsa gnyis lon pa/ chos grwa nA lendra thebs nas lo bcu gsum lon pa de nyid la rong ston chen po'i gsung gi bcud myangs te lo gnyis lon pa sbrul gyi lo la rong ston chen po dag pa'i zhing du bzhud pa nas/ lo de nyid la chos grwa chen po 'bras yul gsar thugs kyi dga' ston gsar pa la longs su spyod pa'i tshe byams chen rab 'byams rje'i zhabs kyi padmor gtugs/ lo ngo lnga la mdo phyogs kyi gnad ma lus pa la sgro 'dogs bcad/ rang lo nyer lnga pa chu mo bya'i lor/ e waM chos ldan du rdo rje 'chang kun dga' bzang po'i zhabs pad bsten/ nyer drug pa shing pho khyi lor rdo rje sems dpa' chen po dkon mchog rgyal mtshan/ sdom brtson sangs rgyas dpal bzang po rnams kyis mkhan po dang las gsang mdzad de bsnyen par rdzogs/ mdor na bya lo nas me pho byi lo ngor chen zhi bar gshegs kyi bar lo ngo bzhi la/ gsung ngag sogs rgyud man ngag gsan/ phyi lor ngor chen zhi bar gshegs na'ang / mus chen sogs mkhas pa du ma la/ gsung ngag sogs rgyud man ngag gi zab bcud blangs te lo ngo brgyad la rgyud man ngag gi sgro 'dogs bcad/ rang lo so gnyis pa lcags pho 'brug lor mdo khams phyogs su gom zung 'phos te 'bras yul nyid du phyag phebs pa na/ rab 'byams chos rje'i thugs rje'i lcags kyus bzung ste/ so gsum pa sbrul lo nas sprel lo'i bar lo bzhi tsam zhig 'bras yul nyid du zur nas 'chad pa'i dbyangs kyi blo ldan rnams yid gsol par byas/ kyai rdo rje'i gzhi bsnyen dang / sdom gsum gyi