[A:291]ma rmongs pas/ /'chi med seng ge'i khengs pa thung ngur mdzad/ /ces gsungs so/
de bzhin du zlos gar gyi bstan bcos kyang paNDi ta sangga shrI las gzugs kyi nyi ma'i bstan bcos dang / dha ra ta la sogs pa gsan cing khong du chud de/ de dag gi tshul phyogs tsam ston pa la rol mo'i bstan bcos zhes bya ba mdzad cing / nyid kyi gsung las kyang / /sngon chad gzhan gyi yid la ma shar ba/ /'di 'dra gang gis shes de blo gros ldan/ /rgan po rnams kyis yang yang rnam dpyad pa'i/ /don de rtogs kyang de la ngo mtshar med/ /ces gsungs shing / bstod pa mdzad pas kyang / sngon byung zlos pa'i gar de skad rigs bzhi/ /brda sbyor la byang rgya mtsho'i mtha' la sogs/ /tshar phyin thugs chud zin dang pham zin pa'i/ /sgra skad kun gyis khyod la lung du ston/ /ces gsungs so/ /
de bzhin du dus sbyor shes pa yang / rtsis kyi gzhi lo zla dag pa/ lnga bsdus/ sgra gcan/ gza' lnga/ nyi zla gza' 'dzin/ du mjug la sogs 'char ba dang / nub pa'i mtha' dang / de dag gi dge legs kyi rtsis dang / dbyangs 'char la sogs pa'i rtsis rnams kyang phul du phin pa mkhyen cing / de dag rgan po rnams la grags zin pa'i phyir/ srol 'byed kyi bstan bcos ni ma mdzad la/ legs par gsungs pa'i brgyud pa'i srol ni mang du yod pa yin no/ /bstod pa mdzad pas kyang / rtsis grangs rig pa kun rdzob rten 'brel che/ za 'og ltar gzigs srid pa'i A darsha/ /dkar nag rtsis la byang ba'i rnam rig gi/ /gtsug lag rgya mtsho ri byi'i khyor chu bzhin/ /zhes gsungs so/ /