[A:311]kun shes kyi rtsa 'grel la sogs pa mang du mdzad cing / sdeb sbyor rin chen 'byung gnas sogs 'gyur yang mang du mdzad/
bshad rgyun 'dzin pa'i slob ma yang / 'ug tshang rin po che/ slob dpon 'dul 'dzin sngon mo/ rta nag rab 'byams pa shes rab chos 'byor/ slob dpon dka' bcu pa skyes mchog /mgon bzang pa rin chen rgyal mtshan bzang po/ kun dga' rgyal mtshan/ bsam 'grub 'od zer ba sku mched/ rta nag pa nor bzang rgya mtsho/ byams chen pa sangs rgyas 'phel/ se ra ba blo gros seng ge/ zha lu ba blo gros seng ge/ dgas po blo gros mtha' yas/ sgra dus la sbyangs pa kun dga' 'od zer sogs mang du byung zhing / khyad par slob ma'i mchog ni zha lu lo chen yin no/ /
gsum pa/ mthar bka' drin che ba zha lu lo chen ji ltar byon pa'i tshul ni/ mkhas pa'i 'byung gnas zha lu gser khang zhes bya ba'i grong khyer du yab lung rtogs kyi yon tan dang ldan pa 'gos kyi rigs sku zhang pa bsam 'grub dpal bzang po dang / yum bud med kyi yon tan thams cad dang ldan pa rin chen chos 'dzom zhes bya ba'i sras su lcags pho byi ba'i lo la sku bltams/ mtshan chos skyong 'bum zhes bya bar gsol/ /
gzhon nu'i tshe yang sngon gyi bag chags kyi dbang gis/ dad brtson shes rab snying rje la sogs pa phun sum tshogs shing / sku rtsed kyi tshe yang chos 'chad pa dang / sgra bsgyur ba dang / yi ge 'dri ba la sogs pas dus 'da' zhing skabs 'gar ting nge 'dzin bzang po la snyoms par 'jug la yang byung /