[A:75] gtsang stod 'dar grang mo che ni/ tshar chen blo gsal rgya mtsho'i gdan sa'i mthil du mdzad/ deng sang yang de'i ring lugs 'dzin pa'i sde ma nyams par yod// // yar klung bkra shis chos sde ni/ tshar chen gyi slob ma mthu stobs kyi dbang phyug yol pa rdo rje 'chang gzhon nu blo gros kyis btab/ phyis su khyab bdag bka' 'gyur ba mgon po bsod nams mchog ldan sogs gnas gsar ba'i dpon dang sku skye rim byon gyis skyong / de yang dpal sa skya pa'i snyan brgyud rgya mtsho'i mdzod 'chang ba/ chos rje tshar pa'i lugs srol 'di ni/ gsung ngag rin po che lam 'bras bu dang bcas pa gtso bor ngor chen rdo rje 'chang nas mus chen sems dpa' chen po dang / des bdag chen rdo rje 'chang nyid la chig brgyud du gnang / gzhan yang yab 'jam dbyangs chos rje nas brgyud pa sogs brgyud srol gsum gyi bka' thams cad bdag chen rdo rje 'chang la babs/ de bzhin du gser chos bcu gsum dang / mgon po che chung sogs chos rje bla ma dam pa nas yar klung klu pa rnams la brgyud pa dang / zhal ngo chig brgyud du byon pa sogs dpal brtse ba chen po'i rnam 'phrul/ mkhas pa'i cod pan/ grub pa'i gtsug rgyan/ zab rgyas gdams