[A:96] kun spyod sogs kyang dam pa gong ma'i dus ltar gong 'phel du gnang bas ngor e waM par phyi mtha'i bar du bka' drin chen pos khyab par mdzad/ de nas lam zab mo'i sgrub pa la gzhol ba'i thugs 'dun thun mong ma yin pa mnga' na'ang / bstan pa'i sbyin bdag sde dge chos rgyal chen po dam tshig rdo rje mched zhal gyis spyan drangs te lhun grub steng gi chos grwar phebs/ mchog dman thams cad kyi gus pas mchod cing so sor bsdu ba'i dngos po rnam bzhi'i sgo nas 'brel tshad phan bder sbyor ba'i phrin las bsam gyis mi khyab pa'i ngang 'tsho zhing gzhes pa ste/ slar yang rgyal ba gnyis pa ma pham pa'i chos kyi bdud rtsis 'dzam gling snang bar mdzad pa'i bar du sku gsung thugs rdo rje'i rang bzhin du brtan cing / phrin las kyi 'jug pa zla bas reg pa'i chu gter bzhin du rgyas par gsol ba 'debs na de de bzhin du 'grub par byin gyis brlab tu gsol/ /de ltar chos grwa chen po lhun grub steng gis gtsos mdo khams sde dge'i mnga' khul du gtso bor ngor e waM pa'i ring lugs 'dzin pa 'dus sde che phra mang du mchis kyang phal cher khri chen sangs rgyas bstan pa dang/ bstan pa tshe ring sogs kyi dus nyams gso gnang ba tsam las/ dang por sus btab zhib par ma nges// / //