[B:64b] mdzad par gsong por smra zhing phan thogs kyang mdzad/ sde snod 'dzin par rlom pa phyogs re thos pas nga rgyal zhing bsam byung gi shes rab dman la/ tshig skam gyis tshim pa mang du lhags pa rnams kyi rtsod pa dang 'bel gtam sna tshogs zhu ba'i lan/ gsung rtsub mos gdong zlog mi mdzad par/ khong rang gang mos kyi bla ma gong ma rnams dang khong rang gi yon tan sogs la bstod par mdzad/ 'bel gtam gyi skabs su 'di nas 'di bshad/ 'di nas 'di bshad gsung nas chos kyi sgo mang po phye te/ de'i brnyas pa ni bcom/ khong rang tsho zhen pa'i grub mtha'i tshig rnams la 'bru gnon du bcug ste/ de la bzlog tu med pa'i lung dang rigs pa shin du rno bas/ tshig 'ba' zhig lhur byed pa ne tsi'i 'don par song ba rnams don sems pa la rab tu sbyar/ bka' dang bstan bcos phyogs med la dpyod tu bcug nas chos thams cad gang zag gcig gi byang chub bsgrub pa'i thabs yin par ni brda' legs par sprad/ sdig pa rnams kyi nang nas lci ba'i mthar thug pa dam pa'i chos spong ba dag la/ las de'i rnam smin bstan nas bzlog par mdzad de/ dge ba'i bshes gnyen spo to ba'i zhal nas/ phyag rgya chen po 'di mdo ting nge 'dzin gyi rgyal po'i don yin pas gsung ba la sogs pas bsam gtan pa rnams la smod pa'i las ngan pa rnams 'chags su bcug pa la sogs pa'i sgo nas thabs kyis yang dag lam la bkod/ gzhi byes kyi dge 'dun thams cad kyang zhag res gus su song / phyir phebs pa'i tshe byin brlabs kyang su mgyogs mdzad nas zhu/ dus 'khor rgyud 'grel grol nas dpe med mtsho'i sbyor drug nyi ma dpal ye shes kyi 'grel pa dang bcas pa dang / [A:153]dbang mdor bstan nA ro 'grel pa'i steng nas bshad pa/ sA dhu pu ta'i 'grel pa/ bde mchog stod 'grel/ rdo rje snying 'grel/ don dam bsnyen pa/ lta 'dod mdor bstan rnams kyi lung / rgyud gsum gsang ba'i bshad pa gnang bas chos 'di la bshad pa de bas bzang ba cig zhu gsung bas skyar nas gnang / bskyed rim yan lag bzhi pa rtsa 'grel/ ngang mo rnam rtsen/ rmi lam dri lan/