[B:37a] gyi rtsa ba/ lce rtse rkan sbyar rnal 'byor la/ rtag tu mnyam gzhag sgrub pa bas/ mkha' sogs dngos po thams cad la/ sangs rgyas nyid ni rtag tu spro/ zhes bya ba rgyas par gsungs pa'i 'gyur yang mdzad/ de nas rim gyis ra lngar phebs nas yun ring bzhugs/ bde mchog bcu gsum ma'i mchod chog dang spyan ras gzigs kyi bstod pa tsarpa Tis mdzad pa gnyis kyi 'gyur yang mdzad/ de'i tshe ri lung sbug gi bla ma sku na sgres pa zhig 'dug pa de la lung mang du bzhugs 'dug pas/ yo ga'i 'grel pa mang po'i lung gsan par [A:86]brtsams pa na/ paN chen dpon slob kyi sku mdun du ma bzhugs par gzhan du bzhugs pa mi rigs par dgongs nas bshol ba yin gsung nas rting du'ang thugs la bcags par mdzad/ de nas rim gyis paN chen rin po che sne'u gdong rtser spyan drangs rjes su/ sgos kyi 'bul ba dang sna len bzang po zhus/ de nas zla ba gcig tsam song ba'i tshe gong ma chen po thugs rang bzhin du mi gnas pa'i rnam par 'gyur ba la rten/ skyam 'chad pa stengs su dben par bzhugs/ de nas zla ba gcig tsam song ba dang / paN chen rin po che'i zhabs drung na bzhugs na bzhed pa dang 'byor bar gsan nas sne'u gdong rtser bzhugs/ snang ba'i phreng ba'i 'grel pa'i 'gyur cig kyang gnang ste 'phror lus/ dril bu rim lnga'i khrid bshad pas legs par brgyan pa zhig gsungs pa gsan nas zin bris su btab/ de la dus 'khor rgyud 'grel dang sbyar ba'i rnam par bshad pa rgyas pa zhig brtsams pa'i rjes su gnang ba yang legs par thob/ de res dang sngar phebs pa'i skabs thams cad du dang por de ring dri ba 'di 'dra ba zhig zhu/ 'di ma go bas 'di zhu dgongs nas spyan sngar phebs pa'i