[B:40b] gis shes dgos par 'dug dgongs pa shar nas 'jug 'grel la rang nyid kyis thugs kyis legs par dpyad cing 'bru mnan zhing thugs kyis dpyod pa 'ba' zhig la gtso bor mdzad pas 'phral 'phral la thugs kyi go ba mang du 'khrungs/ de byung ba tsam gyis 'bad pa chen po yang mdzad pas dbu ma'i grub mtha'i gzhi thams cad der things pa yin/ phyi ltar du ni thang sag pa'i sgros kyi skyar chag kyang legs par mdzad/ rang gi legs par dpyod pa'i rnam dpyod kyi dbu de nas zug pas phar phyin gyi skabs bzhi pa yan du grub mtha' mi gcig pa lnga bcu rtsa drug tsam byung zhes bya ba dang / gzhan yang rnam 'grel gyi bshad pa mdzad pas slob dpon gra rings na re khyed la tshad ma'i mgo 'jug thams cad la mi dang mi gcig pa zhig yod pa 'dra zer ba dang / rnal 'byor gyi dbang phyug shAkya ye shes pa'i gsung nas rtses thang bang so sa la btab nas khyed las grub mtha' mang ba ma byung pa 'dra gsung / mtshan nyid dang rgyud sde'i phyogs gang la'ang thugs kyis dpyad pa'i grub pa'i mtha' dpag tu med pa bzhugs te/ rtsis la 'khrul sel lta bu cig gis mtshon pa yin/ thugs rab legs par byang zhing las su rung ba thob nas gzhan thugs rab can gyi rnam par dpyod pa las myur ba yin/ chos skad rnams kyang shin du gtsang ba [A:95]yin/ lung dang bcas pa yin/ rigs pa dang bcas pa yin/ dka' gnas che bar byed pa thams cad tshegs med du khrol ba yin no/
9 yon tan thams cad la gong nas gong du 'gyur legs par thon pa zhes pa ni/
thang sag tu ma phebs gong gi yon tan thams cad thos pa gtso bor gyur pa yin/ de nas bsam byung gi shes rab chen po 'khrungs nas legs par dpyod pa la zhugs nas gzhan zer gyis rjes zlos mi mdzad pa de byung / slar rtses thang du phebs nas dge sbyong sang chos la rje rin po che'i lam rim chung ba 'dug pa g.yar nas gzigs pas sngar gyi yon tan thams cad kha phyir ltas su song / 'ben phyi rol du btsal bar 'dug da ni des mi 'ong bar chos thams cad rang rgyud dang sbyar nas se ma dgos par 'dug dgongs pa byung nas der yang