[A:134]brgyad cu tham pa'i thog shing pho rta lo gnam du gshegs/ se chen gyi sras che ba rdo rje la sras med/ rgyal po jing gam dang de'i btsun mo go go cen gyi sras che ba ka ma la/ dharma pha la lkugs pa/ o ja dur ti mur dang / gsum yod pa'i/ o ja du 'dis dben cing lo gnyis dang / ta'i ti lo bcu gcig te/ rgyal sa lo bcu gsum mdzad do/ /de'i bu ti shu myur du 'das/ dharma pha la dang btsun mo tha hong tha'i ghi'i sras che ba/ hi shan gyis lo lnga rgyal sa mdzad de/ ming go lug rgyal po yang zer ro/ /sras gnyis pa a yu par pa ta'i sras rgyal srid lo dgu bzung / ming bu yan du rgyal po yang zer ro/ /ka ma la'i sras ye sun the mur gyis rgyal sa lo lnga bzung / bu yan du'i sras sa ti'i pha la g.ying dzung gi gan rgyal pos rgyal sa lo gsum mdzad/ go dan rgyal po'ang zer ro/ /go dan la sras/ ji big thi mur la sogs pa gsum yod/ ye sun thi mur gyi sras/ ra khyi phag gis zhag bzhi bcu rgyal sa gzung / mangga la'i sras a nan ta/ de'i sras u rug thi mur bsad/ de la bu gnyis yod/ go lug rgyal po'i sras che ba/ ku sha las/ khri thog tu lo gcig zhugs te/ go thug rgyal po'ang zer ro/ /gnyis pa thog thi mur gyis rgyal sa lo lnga mdzad/ dzwa yan du rgyal po'ang zer/ ku sha la'i sras gnyis kyi chung ba rin chen dpal rgyal po/ thog mar rgyal sar bton pa/ zla ba gcig song ba dang gnam du gshegs/ de'i skabs su rtsis pa rnams bsags nas rtsis byas pas/ de'i gcen po tho gon thi mur/ bya lo zla ba drug pa shar nas/ rgyal sar bton na se chen dang mnyam pa gcig yong zer ba byung ba la/ mi dpon rnams na re/ de tsam rgyal sa stong par 'jog pa/ rgyal khams kyi khag sus thig zer ba la/ el thi mur tha shi na re/ khyed lam khyim thi sa rnams kyi da dung legs par