[A:308]byung ba dang mnal sad pas/ ci 'dra zhig yin dgongs pa byung yang / phyis su rkang gling skad cher ma byung ba sogs ni rje mus chen de nyid la chos skyong gi bskor rag bsdus shig las ma gsan pa dang / chu rdol ba dang rdzing bskyil ba sogs ni gzhan bde kyai gsang gsum sogs zab chos mu mtha' med pa zhig gsan pa dang / nyi ma nub pa ni rgyal yum de nyid sku ma gshegs bar rje mus chen de nyid ma mjal ba'i rtags su 'dug gsungs/ 'on kyang nyi ma nub pa'i brda' don 'di rje nyid nas rang bstod du 'gyur dogs kyi dgongs pa can gyi gsung stsal ba ma gtogs/ chu rdol nas rdzing bskyil grub pa dang nyi ma nub pa de nyid mus chen nyid nas zab chos zhal lung cig brgyud kyi rim pa mtha' dag bum pa gang byo'i tshul du rje 'di nyid la 'bul bar mdzad nas thugs kyi rdzing du bskyil grub pa dang dgongs pa rdzogs te zhi bar gshegs pa'i rtags mtshan ngo mtsha rar snang ngo / /de nas mi ring bar glang lo cho 'phrul zla ba'i tshes bco lngar rgyal yum de nyid sku gshegs pa'i dgongs rdzogs gsung tshog lam ston sogs zhu ba dang stabs gcig mus chen gyi drung du gsung shog phul te/ rje nyid kyis mjal thub min sogs brtag pa zhus par gegs med mjal ba'i lung bstan gsal por gnang /