[A:325]'dus tshogs la mang 'gyed rgyas pa dus dran rgyun 'don dang / yab rje rin po che dang mus chen gyi gdung rten thun mong du dngul gdung yid bzhin nor bu ngo mtshar rmad du byung ba dang / sku brnyan sku tshad ma/ dngul sku che legs bris sku brgya tshar/ lo dus kyi mchod 'bul du rdo rje rnal 'byor ma'i sgrub mchod gsar 'dzugs sogs snga phyir dgongs rdzogs kyang phul phyin dang / de nas bde mchog gi gsung bsnyen kha skong sbyin sreg dang bcas legs par grub nas der 'khor rnams la 'khor lo bde mchog nag po pa'i smin byed kyang stsal to/ /
de nas dgung lo nyer gsum du phebs pa sa lug lor snga gong rnams nas ston pa'i zhal skyin lha ldan jo shAka rin po che rnam gnyis dang / sprul pa'i gtsug lag khang chen bsam yas mi 'grur lhun gyis grub pas gtsos gnas rten rnams mjal bzhed thugs 'dun che bar yod pa'i khar/ dad stobs ldan pa dbu ru yar rgyab dpon gyi btsun mo nam mkha' mdzod mas snga phyir gdan 'dren nanabaskyar la phebs par zhal gyis bzhes/ zla ba lnga pa'i nang chibs btegs pas mi dbang ka rma phun tshogs rnam rgyal nas kyang nan zhus ltar phyir lam bsam 'grub rtser phebs/ mi dbang 'khor bcas la tshe bka' sogs rjes gnang du ma stsal/