[A:85]'khrid nyams len rnams snga thun dgongs thun gyi tshul dang/ phur chung gtor bsngo/ bskang ba sogs chag med mdzad cing/ sgrub mchod/ dus gtor/ gtor bzlog dbang rjes gnang la sogs pas dus 'da' bar mdzad pa'i gnas skabs thams cad du lta ba 'khor 'das dbyer med kyi sgo nas snod bcud thams cad lha dang ye shes kyi rol par gzigs pas bla ma yi dam mkha' 'gros byin gyis brlabs pa'i dag snang dang mngon par shes pa la sogs pa bsam gyis mi khyab pa mnga' ba gdon mi za yang sbas pa'i brtul shugs kho na gtso bor mdzad cing/ thugs dam gyi tshe mnal lam la ji 'dra byung zhus kyang/ nged lo rta lug yin pas/ lug 'di rmongs pas rmi lam sogs ci yang mi shes phal cher sa lug rang yin pa 'dra gsung zhing/ gzhan gyis nyid kyi yon tan brjod kyang/ de mi zer ba'i thabs dbyibs kyi bka' phebs pa dang/ gsung brtag zhu ba rnams la'ang/ ngas de 'dra mi shes zhes thag chod kyi bka' phebs pa las nyis 'gro'i rigs gtan mi mdzad mod/ 'on kyang shugs 'byung du byung ba ni sde srid karma bstan bsrung pa thugs dran med du 'gro ba la gur drag gi dbang dang/ khro bo bcu'i bsrung 'khor gnang ba tsam gyis sku khams dngas ba dang/ mkhar rtse dpon mo gdon gnod kyis dran pa ma