[A:126]bla ma 'di'i zhabs pad bsnyen nas gsung gi bdud rtsi ngom med du gsol ba zhig byung na ci ma rung dgongs pa'i dad mos lhag par yang 'khrungs pa ni/ rgyal sras shAnta de bas/ da ni bdag gis ci nas kyang / /rigs dang mthun pa'i las brtsams te/ /skyon med btsun pa'i rigs 'di la/ /rnyog par mi 'gyur de ltar bya/ /zhes byang chub sems dpa'i spyod pa bla na med pa'o/ /de tshe mdzod 'dzin gyis/ yab rje mchog sogs bla ma dam pa 'ga' zhig la rje nyid nas zab chos gsan tshul/ da lta gsan mus bcas des rnam 'dren dam pa nyid kyang dbu blar phebs dgos tshul zhib rgyas zhus par/ da lam chos 'brel zhig phul te 'gyangs min phebs pa'i zhal bzhes bstsal/ sang nyin bka' chos bstsal rgyu'i do nub rje nyid thugs spro dga' bde stong gi ngang du 'das shing / de nub zhabs drung gi mnal lam du yab rje bsod nams rin chen de nyid kyi zhabs drung nyid la sbyangs khrus rgyas pa zhig bstsal ba 'khrungs pa'i sang nyin sgrol dkar yid bzhin 'khor lo'i rjes gnang thun mong ma yin pa gsung bshad shin tu rgyas pa dang bcas gnang bas/ gang gi thugs rje dang rje nyid kyis byin rlabs 'phral du bzhugs te ston dang bstan pa gzhan nas mi 'tshol ba'i dad mos dang / yongs rdzogs snyan brgyud bstan pa rin po che'i mnga' bdag tu 'gyur ba'i rten 'brel gyi sarga 'bad med lhun grub tu 'grig par gyur to/ /gnas der khrom dbang dang 'dus tshogs su 'jam dbyangs dmar ser gyi rjes gnang /