[A:162]gzhi dbyings su dengs/ lo de'i ril sgrub gang gi gcung dam pa nyid kyis thugs 'gan bzhes shing / de'i tshe rje btsun gong ma'i bdud rtsi ril bu'i rta rnams mang du spel bar mdzad/ de nas chu stod zla mjug tsam nas thub bstan mkhan po bstan 'dzin rgyal mtshan/ ri khud sprul sku bsod nams dbang phyug sde dge smad shod bla ma yon tan rgya mtsho sogs skal ldan rnams la slar yang zab rgyas kyi bdud rtsi 'di ltar grol bar mdzad do/ /snar thang brgya rtsa rnams kyi rjes gnang yi dam chos srung sogs kyi rjes gnang zur bka' drug cu brgal tsam sbyong rgyud dkyil 'khor bcu gnyis kyi dbang / bde mchog nag po lugs sogs dbang chen zur bka' bcu drug jo lugs dang / nyi sbas sgrol ma nyer gcig gi rjes gnang gro bzhin phur sgrub thog phur dbang bcas te dus gnas thams cad du zang zing dang bral zhing / bsod nams 'phel ba'i rgyur 'gyur ba chos sbyin 'ba' zhig gis dus 'da' bar mdzad de/ sangs rgyas kyi bstan pa rin po che nam langs nyi shar lta bu zhig byung na ci ma rung dgongs pa'i thugs bskyed gzhar yang mi bskyud pa 'di ni/ klu'i rgyal po rgya mtshos zhus pa'i mdo las chos kyi sbyin pas ni zag pa zad pa'i mngon par shes pa rnam par dag par 'gyur ro/ /zhes dang / rin chen phreng bar/ chos kyi ched dang de bzhin du/ /gzhung gi don dag dran pa dang / /chos kyi sbyin pa dri med pas/ /tshe rabs dran pa thob par 'gyur/ /zhes sogs mang du gsungs