[A:502]gnas der dogs skyon gyis spo bar brtsam pa na sus kyang sgul bskyod ma nus pa'i ngo mtshar can dang / yar lung shel brag gnas gzigs kyis gu ru'i sgrub phug tu thugs dam nyams bzhes skabs slob dpon rin po ches thengs gnyis tsam zhal dngos su bstan te/ ma 'ongs lung bstan spyi dang bye brag snyigs dus der rje nyid nas spang blang ji ltar mdzad dgos sogs lung bstan dang rjes su lung bstan mang du brnyes kyang bdag chen shin tu gsang bar mdzad pa sogs/ bdag chen nyid nas a li chos rje'i sprul sku gong ma ngag dbang chos grags kyis zur tsam bka' las thos tshul sprul sku nyid kyi rnam thar nang gsal ba las gzhan pa'i de skabs gsung rgyun zin bris zhib par mi gnang bas 'god ma nus/ de ltar dbus lho byang gi 'gro don rnams mdzad zin te gtsang gam pa la nas sgang brgyud nas gdan sa chen po dang nye bar phebs pa na/ der bzhugs rnams nas ser 'phreng rdo rje chos skyong phebs pa dang bcas pho brang gzhi thog tu gdan drangs te de'i sang nas bzung chos srung rnams la bskang gso brgya tshar/ gzhis byes rnams la gsol ston rgya cher stsol ba sogs dga' ston gyi dpal la rol ba mdzad do/ /de nas ring min mgon khang rnams su gtang rag dang sngar yar lung shel brag tu zhal gzigs ji ltar byung ba bzhin gu ru rin po che gtso 'khor gyi snang brnyan rin chen gnyis pa las grub pa tsha gser can rin chen du ma'i phra tshom kyis spras pa'i bzhugs khri gser zangs las grub pa nang