[A:550]gsar du bskrun pa dang / nang rten gsar bzhengs kyang gong du bshad pa yab rje rdo rje 'chang dbang gyi mtshan can gyi gdung rten/ zhabs lha'i rten gtso rnams dang gser kong dang / gzhan yang dbu bla lnga kun bkras kyi 'dra sku/ rgya dngul lugs ma'i dges rdor lha dgu gser zangs kyi pad sdong can/ yab rje dbang gi mtshan can gyi sku dus bzhengs gnang ril sgrub skabs mdun bskyed rten 'dra cog gsar bzhengs mdzad pa sogs mang ba/ nyams gso mdzad tshul lha chen khyams stod ka chen zhig rtsa ba sar nub/ gdung zhom ste/ ldib zhom yong la khad pa byung ba rje nyid nas chos bdag yid bzhin nor bu'i bskang 'phrin gnang bas skyon med kyi mtshan ma gsal ba bzhin rdo shing sogs las byed rnams nas/ las tsam pas tshegs med ka gdung 'degs thub pas/ las byed rnams la dpa' dar sogs gsol ras kyang gya nom pa bstsal ba dang / rab gnas kyang mdzad pa da bar skyon 'gyur ma byung ba dang / lha chen chos grwa 'di yang nyams gso gsar bzhengs dang 'dra bar mdzad cing rab gnas kyang rgyas pa gnang / me bya lo mjug tsam la thar rtse mkhan chen byams pa kun dga' bstan 'dzin nyid khams phebs 'khor te/ gdan sa chen po sku mched yab sras rnams mjal phyag tu phebs/ gzhung 'bul ja 'khor drug brgya sogs ha cang gtos che ba dang sku sger so so la'ang 'bul stobs che ba dang / chos sde lho byang 'dus sde la mang 'gyed tshan che ba bstabs shing / de sngon nas bdag khri yab sras rnams nas dbu blar