[A:267]las/ /bsnyung gsol slad du de dag sprin lta bur/ /gtibs pa'i ljags kyi glog rab 'gyu ba yi/ /sgeg pas dmar ba mchog gi 'bab stegs las/ /bdud rtsi'i char du che ba 'gran bzhin du/ /'phags pa skyon med 'dzum pa'i zhi ba lhas/ /sems dpa' che'ang sprul pa'i nye bar len/ /phung po 'di la dkar nag 'dren ma yi/ /las rnams phreng ba bzhin du btags par gsungs/ /mtha' bral lta ba'i mgon po klu sgrub kyis/ /'dus byas bshes mo sgyu ma'i me long du/ /gtod byed med pa'i rnam par snang ba gang / /mi rtag ngo bo nyid du rtogs par mdzad/ /gnyis su ma yin rang gi sprul pa'i gzhi/ /'jam pa'i dbyangs su snyan pa'i grags chen des/ /
khyed kyi
tshe rabs phreng ba kun tu lhag pa'i lhar/ /'bral ba med pa'i zhal gyis rnam par 'ches/ /rdo rje zla ba dag pa'i snying po kun/ /'thungs don gsal ba'i dri med 'od dkar gyis/ /phyag na padma sngon med bzhad pa can spyan ras gzigs dbang phyug gis
/ /reg pas bsil ba'i mtshan nyid yongs ma btang / /gdod nas las nyon dgra mngon bcom pa la/ /nyer mkho med kyang 'khor ba 'jig pa yi/ /lang tsho'i dpal mo chos kyi dbyings ster ba/ /bde bar gshegs pa'i ma gcig de yis mdza'/ /mi 'jigs bde chen rgyas pa'i dga' ldan gyi/ /bdag po mi pham rnam par rgyal ba yis/ /bye ba khrag khrig ting 'dzin g.yo med sgo/ /legs par phye ba'i sar mngon gzhag stsal to/ /zag pa med pa'i zhe sdang me lce la/ /bdud rnams phye ma lheb ltar lceb pa yi/ /bar du gcod pa'i ming gis dbul byed pa'i/ /don las mi g.yo mgon pos rjes su gzung / /sangs rgyas kun gyi mdzod 'di la/ /gnas pa mchog gi rin chen tshogs/ /rab dga' ldan pa'i lha thams cad/ /lan gcig min pa'i gzigs pa brten/ /nag po'i phyogs rnams tha mar dbyung ba'i tshes/ /nyer dgu'i mtshan mo'i rtse dga' rnam dag ma/ /zhi