[A:69a]gtor chen rnams rnying ma lugs kyi lag len zhib par bslabs so/ /de nas bo dong er byon snur chor 'phags rgyal mtshan la yo ga stod lugs pa'i 'grel pa la brten pa'i dbang bka'/ de nyid 'dus pa'i rgyud/ stod 'grel smad 'grel/ rdor 'byung sems dpa' 'byung chung / ko sa la'i rgyan a wa ta ra/ dpal mchog smad 'grel/ phyag na rdo rje'i dkyil 'khor la 'jig rten pa drug btags pa'i sbyong rgyud kyi dbang bka'/ gtsug tor rnam rgyal gyi rtogs pa gnyis/ tshe dpag med 'chi med rnga sgra/ kha 'bar ma'i gzungs gnyis/ tshul brgya lnga bcu pa la sogs pa gsan no/ /khong pas kyang lta sgom spyod 'bras la sogs pa mang du zhus so/ /de'i tshe bla ma byang sems rgyal ye'i dbon po 'ongs nas bu chen thams cad kyi dgon pa bde chen 'dzin par zhus pas/ dgon chung sdug bsngal gyi btson rar dgongs nas mdzad du ma bzhes par/ dbon chung la slob gnyer mdzub khrid du mdzad nas bskos so/ /de nas stod phyogs kyi dge ba'i bshes gnyen khrid zhu/ dbang zhu/ lung zhu zer ba mang po byung nas/ nyin rang lung dang bshad pa mdzad/ mtshan rang cho ga mdzad de nyin mtshan khor yug chos 'chad pa la 'bad pa mdzad kyang / 'jig rten blos btang nas sgrub pa mthar 'don pa cher ma byung / po ti rkang btsugs nas slob gter byed pa'ang mang po ma byung bas thugs 'jungs te/ chos kyi rnam grangs gsog pa'i lung thob tshod ma tshwa blta ba lta bu 'di la dgos pa mi 'dug dgongs nas/