[A:89b] cis kyang dgos gsungs pa nas zhu yig spyan zur g.yo rten bo dhi tsitta'i 'phreng ba la rgya mdzes phul zhes gsungs pa 'dug pa mthong bas sems dga' ba dang spro ba tshad las 'das pa rab dga'i sa thob pa ltar gyur pa yin no/ /tshul de lta bu'i sgo nas mtshams sbyar te yun ring po ma lon pa kho bo cag rang lo bcu bdun du sleb pa rje nyid dgung gi lo bdun cu rtsa gnyis su phebs pa'i glang gi lo gling dga' bde ba can gyi chos grwa chen por rje bla ma nyid zhal mjal/ de nas bzung lo grangs du ma zhig gi bar du dad pa dang gus pa che cher bgyis te/ dam pa de nyid kyi zhal gyi bum bzang las/ skal bzang las 'phro can bdag gis dam pa'i chos kyi bdud rtsi ci yang zhig thob pa yin te de yang bstan pa'i rtsa ba so sor thar pa'i sdom pa gsol bzhi'i cho ga la brten nas dge bsnyen yongs su rdzogs pa'i bar dang / sems bskyed kyi sdom pa dbu sems kyi lugs las khyad par du 'phags pa'i brgyud pa gnyis ldan gyi cho ga las legs par nos shing / rig pa 'dzin pa sngags kyi sdom pa rgyud sde'i dgongs pa tshad ldan gyi skyes bus legs par bkral ba'i dkyil 'khor bgrang ba las 'das pa rnams su cho ga rnam par dag pa'i sgo nas thob par mdzad de/ mdor na bstan pa'i rtsa ba sdom pa gsum po so so'i cho ga dang / dbang dus su gsum char thob par gsungs pa'i bka' drin nos shing / der rjes brgyud pa dri ma med pa las 'ong ba'i thun mong dang thun mong ma yin pa'i zab khrid mi 'dra ba lnga phrag gsum tsam dang / de dag dang 'brel ba'i rgyud rgya gzhung 'grel pa 'grel bshad dang bcas pa'i chos tshul rgya mtsho lta bu'i bka' drin