[A:13b]kyis mdzad pa ma yin te/ sgrub thabs mdor byas dang mi mthun zhing / klu byang gi dkyil chog nyi shu pa dang yang mi mthun pa'i phyir zhes gsungs nas mtha' gcig tu slob dpon gyi mdzad pa min par kha tshon gcod pa mdzad/ de la re mda' ba chen pos klu byang gi gzhung dang mi mthun pa'i rgyu mtshan gyis klu sgrub kyi gzhung mi 'thad par bsgrub par mi rigs te/ slob ma'i gzhung dang mi mthun pa sgrub byed du byas nas slob dpon gyis gzhung 'gog pa mi 'thad pa'i phyir/ des na klu sgrub kyi gzhung dang mi mthun pas na/ klu byang gi gzhung the tshom can du byed dgos kyi/ klu sgrub gyis mdzad pa 'di 'thad ldan du rigs so zhes gsungs la/ red mda' ba'i bzhed pa de la rang lugs kyi mkhas pa kha cig de ni shin tu mi 'thad de/ dkyil chog gnyis po de'i nang nas klu byang gi dkyil chog ni rgya gar ba'i paN grub mang pos tshad ldan du zhal gyis bzhes pa'i phyir te/ zung 'jug gsal ba'i ye shes dbab pa'i skabs su/ grub chen klu byang gis spel ba'i dkyil 'khor cho ga nyi shu pa las shes par bya'o/ /zhes gsungs shing / a bhya ya dang / kha che paN chen la sogs pas kyang tshad mar mdzad pa'i phyir ro/ /gzhan yang dkyil chog dang po klu sgrub kyis mdzad pa yin na/ klu byang dang / sgra gcan 'dzin gnyis kyis de'i rjes su de dang mi mthun pa'i dkyil chog re mdzad pa don med pa'i phyir/ des na dang po the tshom can du grub bo zhes gsungs kyang rje rdo rje 'chang gi gsung rgyun zin bris 'ga' zhig las/ bu ston gyis klu'i byang chub kyi cho ga nyi shu pa dang mi mthun pa'i phyir na/ slob