[A:20a]bcad pa mdzod dang / grol ba'i thig le dang / bdag grub par bsgrub pa dang / byang chub sems kyi thig le dang / bkra shis kyi rnam bshad chen mo dang / bzhi pa la 'jug pa thabs dang bcas pa dang / chu sbyin dbang po'i sgrub thabs gsum ste de ltar na lung dang mthun pa'i gzhung bcu bzhi mdzad do zhes gsungs pa ltar yin pa phal cher las bshad do/ /'on kyang bcu bzhi po'i ngos 'dzin gtsang hrig pa zhig dgos pas rtog dpyod zhib mo'i sgo nas dpyod ldan dag gis 'grel pa der bshad pa'i gzhung gi grangs de 'dor len dang / gzhan yang bcu bzhir bshad pa'i khungs gsal ba zhig btsal bar bya'o/ /'o na slob dpon des mdzad pa'i dkyil chog cig yod kyang / de nyid sman pa'i zhabs sogs kyis ma gzigs par bshad pas na/ lugs 'dis dbang chog gzhung gang la brten snyam na/ grub chen de'i slob ma'i mchog mar me mdzad bzang pos gsang ba 'dus pa'i dkyil 'khor gyi cho ga bzhi brgya lnga bcu pa la brten nas lugs 'di'i rjes 'brang gi 'phags yul gyi paN grub dag lugs 'di'i dbang mdzad cing / 'di nyid tshad mar kun gyis 'dzin pa yin te/ grub chen dman pa'i zhabs kyi gsung las/ rang gi grwa pa'i tshogs nas rgyal tshab kyi sar 'os pa'i slob ma bco brgyad kyi nang nas bden pa mthong ba ni/ mar me mdzad bzang po/ rab zhi bshes gnyen/ sgra gcan 'dzin bzang po/ rdo rje bde ba chen po dang bzhi yod pa las/ kho bo ni dang po'i rjes su 'brangs ste bla ma chen po'i rim pa ji lta ba bzhin 'dug pa'i phyir ro/ /