[A:20b]zhes gsungs pas so/ /gzhan yang lugs 'di la grub chen de dag gi rjes su 'brang ba'i sgrub thabs sogs kyi gzhung phran yang du ma yod par bshad la/ de lta bu'i gsang ba 'dus pa ye shes zhabs lugs su grags pa 'di rang gi ngo bo pha rgyud yin pa gzhir bcas kyang / bskyed rim bsnyen sgrub yan lag bzhi dang / rdzogs rim grol ba'i thig le zhes pa 'khor lo bzhir thig le bzhi bsgoms nas dga' ba bzhi dang / lhan skyes kyi rtogs pa skyed par byed pa ma rgyud dang mthun pa dang / lam gyi sngon 'gro smin byed kyi dbang yang ma rgyud dang mthun par bshad do/ /yang srol gsum pa ni slob dpon shAnti pas rtsa rgyud phyi ma gnyis sbrel nas 'chad pa'i 'grel pa snyim pa'i me tog ces bya ba mdzad pa ste/ 'di nas mi bskyod pa gtso bor byas pa'i gsang ba 'dus pa lha nyer lnga'i dkyil 'khor gyi dbang chog bskyed rdzogs kyi rnal 'byor tshang ba dang bcas pa ston zhing / lta ba ni sems tsam pa dang mthun pa ste/ 'grel pa de nyid las/ chos 'di la ni rnam par rig pa tsam du blta bar bya ste/ zhes gsungs pas so/ /des na slob dpon shinti pas gsang ba 'dus pa'i chos skor/ 'phags lugs pa'i slob dpon rgyal sras sa 'dres pa dang / ye shes zhabs lugs pa'i slob dpon dman zhabs gnyis la gsan pa yin kyang / lugs de gnyis gang gi nang du yang mi 'du ste/ 'grel pa de nas mi bskyod pa gtso bor byas pa'i lha nyer lnga'i dkyil 'khor zhig bstan pas ye shes zhabs lugs kyang min par bshad cing / lta ba rnam rig tu bkral bas 'phags lugs kyang ma yin pas so/ /