[A:30b]mo mtshan thog thag bzlas pas 'chi bdag gi chad pa las thar te tshe'i rig 'dzin brnyes/ de nas lo brgyad lon pa na bram ze chen po de nyid kyi drung du rab tu byung zhing rim gyis shes bya rig pa'i gnas rnams dang theg pa che chung thams cad la sbyangs so/ /phyis pha ma dang mjal bar bzhed nas pho nya bas brda sbyar ba/ pha ma na re/ da mya ngan gsang sgrogs mi dgos zer nas yid ma ches/ de la lo rgyus zhib par bsnyad pas yid ches/ pha ma dang mjal thams cad dga' mgur gyur to/ /de nas bram ze chen po de nyid la gsang ba 'dus pa la sogs pa'i gsang sngags kyi chos zhus pas/ des kyang dkyil 'khor du bcug dbang bskur/ rgyud bshad/ zhal nas snyan du brgyud pa'i gdams pa dang rjes su bstan pa ma lus pa gnang ngo / /de nas bram ze chen po de nyid la mkhan po zhus nas bsnyen par rdzogs par mdzad nas mtshan dge slong dpal ldan zhes btags so/ /de lta bu'i mkhan po sgra gcan zin dang / grub pa brnyes pa'i mtshan sa ra ha gnyis lo rgyus phal cher las gcig pa kho na 'byung yang / mkhas pa'i dbang po mang thos klu sgrub rgya mtshos de gnyis las tha dad par bshad la/ gang ltar de'i tshe mkhan pos lo bcu gnyis su mu ge yong bas gtsug lag khang nyams dmas par gzigs nas/ dge 'dun rnams kyi zhal lta bar dge slong dpal ldan bskos te dpal gyi ri la gshegs/ der dge slong dpal ldan gyi thugs dgongs la gser 'gyur gyi rtsi byas la dkon mchog dang dge 'dun gyi zhabs tog bya'o snyam du dgongs te/