[A:37a]phyin par mdzad nas slob dpon dang lhan cig dpal gyi ri la bzhugs so/ /de skad du yang bzhi brgya pa'i 'grel pa las/ 'di ltar slob dpon 'phags pa lha ni singga la'i gling du 'khrungs pa/ singga la'i rgyal po'i sras zhig ste mthar rgyal tshab bor nas de nyid du rab tu byung zhing / de nas lho phyogs kyi rgyud ltar 'ongs te/ slob dpon klu sgrub kyi nye gnas nyid du gyur ces gsungs pa yin no/ /dus de'i tshe rgya gar shar phyogs na bud med nyi shu tsam zhig sangs rgyas kyi bstan pa la gus par gnas so/ /bud med gcig la bram ze'i rigs kyi khye'u gcig btsas/ cher skyes nas sgra tshad la mkhas par bslabs/ der ma nang pa yin pas nang pa la gzud par 'dod kyang / pha phyi pa yin pas mu stegs dbang phyug chen po'i grub mtha' la bcug ste phyi rol pa'i grub mtha' la mkhas par sbyangs shing / dbang phyug bsgrubs pas zhal mngon sum du mthong ste khyod ci 'dod zer ba la/ phyogs las rnam par rgyal bar 'dod do zhes zhus pas/ mngal skyes thams cad kyis thub par med par gyur cig ces mchog gi dngos grub dang / kho rang la sgra tshad kyi shes rab thod rgal ba zhig dang / sring mo paNDi ta zhes bya ba sgra tshad kyi rtsod pa mkhas pa zhig dang / ne tso paNDi ta zhes pa sgra tshad la mkhas pa zhig dang / the le skor paNDi ta zhes pa sa la bskyur ba tsam gyis sgra tshad sbyor ba'i yi ge rang bris su yong ba zhig ste thun mong gi dngos grub bzhi byin no/ /de bzhis ma thub na nga rang snying gi dkyil du zhugs la byin gyis rlob bo