[A:45a]mkhas pa'i bzhed pa mi mthun pa mang du yod pa de dag las/ bka' gdams pa rnams jo bo de ltar gsungs pas dngos slob yin gsungs pa mi rigs te/ zla ba grags pa de slob dpon klu sgrub kyi dgongs pa phyin ci log pa skong ba'i brgyud pa'i slob ma yin pa la dgongs nas/ klu sgrub slob ma zla grags yin zhes gsungs pa yin gyi/ dngos slob tu ston pa ma yin pa'i phyir ro/ /bu ston gyis sngar gyi jo bo'i lung de dang klu sgrub kyi lung drangs nas dngos slob tu bzhed pa la yang legs par brtags na 'thad phyogs ma yin te/ jo bo'i lung gi don ni gong du bstan zin la/ klu sgrub kyis lung de skye med mdzod nas yin pas/ skye med mdzod ni klu sgrub kyis mdzad pa ma yin par bu ston rang gi chos 'byung las bshad nas/ rgyud bshad thabs gsang ba'i sgo 'byed las/ slob dpon klu sgrub kyis kyang zhes gsungs nas skye med mdzod kyi lung drangs pas/ skye med mdzod klu sgrub kyis mdzad pa yin par bzhed 'dug pas nang 'gal bas so/ /des na nang 'gal gyi gsung gis gzhan lugs 'gog cing rang lugs bsgrub pa ni mkhas pa'i zhal nas 'byung rigs pa'i gtam ma yin no/ /ri bo dge ldan pa'i gsung de la ni rnam dpyad gtan nas ma byung ste/ zla grags tshe'i rig 'dzin brnyes pa yin kyang / zla grags ma byon gong du klu sgrub 'das zin pas/ zla grags kyis tshe'i rig 'dzin brnyes pa des/ klu sgrub sngon du 'das zin pa'i dngos slob yin pa la gcig kyang phan rgyu mi 'dug pa'i phyir ro/ /yang mkhas pa'i dbang po klu sgrub rgya mtshos lung rigs kyi sgrub byed gong du