[A:44b]pas so/ /zhes sogs gsungs na zla grags klu sgrub kyi dngos slob yin pa lta bu zhig bzhed/ yang rje rdo rje 'chang kun dga' bzang po'i gsung rgyun gung rus 'bri bar mdzad pa'i gsang 'dus rnam bshad las/ 'o na zla ba grags pa 'di klu sgrub kyi dngos slob yin nam zhe na/ 'phags pas rgyal bu la dbu sbyin par btang rjes zhal mjal ba lta bu la ni 'gal ba med de/ sangs rgyas mya ngan las 'das pa'i tshul bstan pa'i rjes su zhal mjal ba dang / grub chen klu byang lho phyogs dpal gyi ri la da dung yang tshe'i rig 'dzin brnyes nas bzhugs pa skal ldan rnams deng sang yang zhal mjal ba yin no/ /'phags pas dbu sbyin par ma btang gong du dpon slob tu byas nas 'chad nyan byas pa'i dpon slob ni min te/ zla grags 'di nA ro pa'i bla ma tsandra go mi dang dus mtshungs su bshad pa dang / zla grags kyi dus na ArYa de ba'i slob ma gnas brtan chos skyong ste birWa pa yang byon zin par bshad pa dang / klu sgrub dang de'i dngos slob phal cher yang 'das zin par zla grags rang nyid gsungs te zhes gsungs nas/ 'jug pa rang 'grel nas lung 'dren yang mdzad cing / srad bu kun blo'i gsang 'dus rgyud bshad sngon 'gro zin bris las/ dngos slob tu 'dod pa la lung rigs kyi gnod byed mang du brjod nas rang gi bzhed pa la/ des na zla grags kyis klu sgrub kyi zhabs dus kyi dbang du byas na ma zin pa yin la/ phyis zhal bstan nas byin gyis brlabs pa ni ma bkag go zhes gsungs pas/ rje btsun kun dga' bzang po yab sras rnams ni dngos slob min par bzhed do/ /gnyis pa rang lugs 'thad pa'i phyogs ngos bzung ba ni/ de ltar