[A:46a] jo bo rje spyan 'dren par phyin pa'i lam yig na gsal bar bshad pas de yang dgag par mi nus shing / des na ston pa mya ngan las 'das nas lo bzhi brgya na klu sgrub byon nas lo drug brgya bzhugs pa yin pa la ni rtsod pa cher med/ zla grags kyis lo lnga brgya bzhugs pa tsam zhig bshad kyis/ de las lhag pa bzhugs pa'i bshad tshod mi snang / rig pa'i khu byug gis lo sum brgya bzhugs/ de'i slob ma a ti sha yin pas/ klu sgrub ston pa mya ngan las 'das nas lo stong 'das pa'i tshe mi bzhugs pa ni gong gi lo grangs brtsis pas shes/ de nas zla grags kyis dgung lo lnga brgya/ de'i steng du rig pa'i khu byug gis dgung lo sum brgya bsnan pas brgyad brgya ste ston pa 'das nas lo stong dang brgyad brgya nas jo bo rje byon par khas len dgos byung la/ de ni mi rung ste/ jo bo rje ni ston pa 'das nas lo sum stong lhag tsam 'das pa na byon pa yin par bstan rtsis dang lo rgyus tshad ldan thams cad las bshad pas so/ /de bas na klu sgrub kyi dngos slob zla grags/ des lo lnga brgya bzhugs/ de'i slob ma rig pa'i khu byug des lo sum brgya bzhugs/ de'i slob ma jo bo rje/ de nyid ston pa mya ngan las 'das nas stong phrag gsum lhag pa tsam na byon gsungs pa 'di dus mi 'grig pas 'thad pa'i gnas su ma mchis/ ci ste klu sgrub kyis lo drug brgya lhag bzhugs pas skyon med snyam na/ des kyang skyon spong mi thub ste/ klu sgrub kyis lo drug brgya las lhag pa stong tsam bzhugs pa yin na'ang / zla grags kyis klu sgrub kyi zhabs zin rgyu ma byung bas/ rig pa'i khu byug gi dngos slob ma yin pa'am/ rig pa'i khu byug la che chung gnyis su mdzad na 'grig tsam yong ngam gsungs