[A:༤༦ན]་ཇོ་བོ་རྗེ་སྤྱན་འདྲེན་པར་ཕྱིན་པའི་ལམ་ཡིག་ན་གསལ་བར་བཤད་པས་དེ་ཡང་དགག་པར་མི་ནུས་ཤིང་། དེས་ན་སྟོན་པ་མྱ་ངན་ལས་འདས་ནས་ལོ་བཞི་བརྒྱ་ན་ཀླུ་སྒྲུབ་བྱོན་ནས་ལོ་དྲུག་བརྒྱ་བཞུགས་པ་ཡིན་པ་ལ་ནི་རྩོད་པ་ཆེར་མེད། ཟླ་གྲགས་ཀྱིས་ལོ་ལྔ་བརྒྱ་བཞུགས་པ་ཙམ་ཞིག་བཤད་ཀྱིས། དེ་ལས་ལྷག་པ་བཞུགས་པའི་བཤད་ཚོད་མི་སྣང་། རིག་པའི་ཁུ་བྱུག་གིས་ལོ་སུམ་བརྒྱ་བཞུགས། དེའི་སློབ་མ་ཨ་ཏི་ཤ་ཡིན་པས། ཀླུ་སྒྲུབ་སྟོན་པ་མྱ་ངན་ལས་འདས་ནས་ལོ་སྟོང་འདས་པའི་ཚེ་མི་བཞུགས་པ་ནི་གོང་གི་ལོ་གྲངས་བརྩིས་པས་ཤེས། དེ་ནས་ཟླ་གྲགས་ཀྱིས་དགུང་ལོ་ལྔ་བརྒྱ། དེའི་སྟེང་དུ་རིག་པའི་ཁུ་བྱུག་གིས་དགུང་ལོ་སུམ་བརྒྱ་བསྣན་པས་བརྒྱད་བརྒྱ་སྟེ་སྟོན་པ་འདས་ནས་ལོ་སྟོང་དང་བརྒྱད་བརྒྱ་ནས་ཇོ་བོ་རྗེ་བྱོན་པར་ཁས་ལེན་དགོས་བྱུང་ལ། དེ་ནི་མི་རུང་སྟེ། ཇོ་བོ་རྗེ་ནི་སྟོན་པ་འདས་ནས་ལོ་སུམ་སྟོང་ལྷག་ཙམ་འདས་པ་ན་བྱོན་པ་ཡིན་པར་བསྟན་རྩིས་དང་ལོ་རྒྱུས་ཚད་ལྡན་ཐམས་ཅད་ལས་བཤད་པས་སོ། །དེ་བས་ན་ཀླུ་སྒྲུབ་ཀྱི་དངོས་སློབ་ཟླ་གྲགས། དེས་ལོ་ལྔ་བརྒྱ་བཞུགས། དེའི་སློབ་མ་རིག་པའི་ཁུ་བྱུག དེས་ལོ་སུམ་བརྒྱ་བཞུགས། དེའི་སློབ་མ་ཇོ་བོ་རྗེ། དེ་ཉིད་སྟོན་པ་མྱ་ངན་ལས་འདས་ནས་སྟོང་ཕྲག་གསུམ་ལྷག་པ་ཙམ་ན་བྱོན་གསུངས་པ་འདི་དུས་མི་འགྲིག་པས་འཐད་པའི་གནས་སུ་མ་མཆིས། ཅི་སྟེ་ཀླུ་སྒྲུབ་ཀྱིས་ལོ་དྲུག་བརྒྱ་ལྷག་བཞུགས་པས་སྐྱོན་མེད་སྙམ་ན། དེས་ཀྱང་སྐྱོན་སྤོང་མི་ཐུབ་སྟེ། ཀླུ་སྒྲུབ་ཀྱིས་ལོ་དྲུག་བརྒྱ་ལས་ལྷག་པ་སྟོང་ཙམ་བཞུགས་པ་ཡིན་ནའང་། ཟླ་གྲགས་ཀྱིས་ཀླུ་སྒྲུབ་ཀྱི་ཞབས་ཟིན་རྒྱུ་མ་བྱུང་བས། རིག་པའི་ཁུ་བྱུག་གི་དངོས་སློབ་མ་ཡིན་པའམ། རིག་པའི་ཁུ་བྱུག་ལ་ཆེ་ཆུང་གཉིས་སུ་མཛད་ན་འགྲིག་ཙམ་ཡོང་ངམ་གསུངས་