[A:61b]theg pa chen po'i gzhung du ma las gsungs/ de yang gsang ba bsam gyis mi khyab pa'i mdo las gsungs tshul ni/ gong du sangs rgyas stong 'byon tshul gyi skabs su rgyas par bshad pa ltar/ 'khor los sgyur ba'i rgyal po yul 'khor bsrung la rgyal sras stong yod pa des/ btsun mo dpe med ma dang / ma med ma gnyis kyi pang du khye'u chos sems dang / chos kyi blo gros gnyis brdzus te byung ba'i chos sems kyis sangs rgyas stong po thams cad kyi gsang mdzod 'dzin pa bka' bsdu pa por smon lam btab pa ni/ 'dzam bu gling pa'i mi'i snang ngor kun dga' bo/ mi mjed 'jig rten gyi khams su gsang ba'i bdag po/ gzhi dang snying po me tog gis brgyan pa'i zhing khams su kun tu bzang po/ 'og min stug po bkod pa'i zhing khams su rdo rje sems dpa'i skur bstan pa de nyid yin te/ spyi rnam gyi don bsdus tshul gsum gsal rgyan las/ khyad par 'khor gyi gtso bo bsdud pa po/ /ston pa'i gnyis su med pa'i ye shes las/ /gzhan ngor sprul pa'i byang chub sems dpa' ste/ /'og min gnas dang me tog rgyan gyis brgyan/ /mi mjed zhing dang khyad par mi yi ngor/ /rim bzhin rdo rje sems dpa' kun tu bzang / /gsang ba'i bdag po kun dga' bo zhes grags/ /zhes gsungs pa ltar ro/ /khyad par du gsang sngags rdo rje theg pa bsdus pa'i tshul ni/ spyi rnam las ji skad gsungs pa'i don bsdus nas tshul gsum gsal rgyan las/ khyad par sngags kyi tshul rnams bsdus pa'i tshul/ /'di la log par rtog pa gzhan yod kyang / /