[A:༦༡བ]ཐེག་པ་ཆེན་པོའི་གཞུང་དུ་མ་ལས་གསུངས། དེ་ཡང་གསང་བ་བསམ་གྱིས་མི་ཁྱབ་པའི་མདོ་ལས་གསུངས་ཚུལ་ནི། གོང་དུ་སངས་རྒྱས་སྟོང་འབྱོན་ཚུལ་གྱི་སྐབས་སུ་རྒྱས་པར་བཤད་པ་ལྟར། འཁོར་ལོས་སྒྱུར་བའི་རྒྱལ་པོ་ཡུལ་འཁོར་བསྲུང་ལ་རྒྱལ་སྲས་སྟོང་ཡོད་པ་དེས། བཙུན་མོ་དཔེ་མེད་མ་དང་། མ་མེད་མ་གཉིས་ཀྱི་པང་དུ་ཁྱེའུ་ཆོས་སེམས་དང་། ཆོས་ཀྱི་བློ་གྲོས་གཉིས་བརྫུས་ཏེ་བྱུང་བའི་ཆོས་སེམས་ཀྱིས་སངས་རྒྱས་སྟོང་པོ་ཐམས་ཅད་ཀྱི་གསང་མཛོད་འཛིན་པ་བཀའ་བསྡུ་པ་པོར་སྨོན་ལམ་བཏབ་པ་ནི། འཛམ་བུ་གླིང་པའི་མིའི་སྣང་ངོར་ཀུན་དགའ་བོ། མི་མཇེད་འཇིག་རྟེན་གྱི་ཁམས་སུ་གསང་བའི་བདག་པོ། གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་ཁམས་སུ་ཀུན་ཏུ་བཟང་པོ། འོག་མིན་སྟུག་པོ་བཀོད་པའི་ཞིང་ཁམས་སུ་རྡོ་རྗེ་སེམས་དཔའི་སྐུར་བསྟན་པ་དེ་ཉིད་ཡིན་ཏེ། སྤྱི་རྣམ་གྱི་དོན་བསྡུས་ཚུལ་གསུམ་གསལ་རྒྱན་ལས། ཁྱད་པར་འཁོར་གྱི་གཙོ་བོ་བསྡུད་པ་པོ། །སྟོན་པའི་གཉིས་སུ་མེད་པའི་ཡེ་ཤེས་ལས། །གཞན་ངོར་སྤྲུལ་པའི་བྱང་ཆུབ་སེམས་དཔའ་སྟེ། །འོག་མིན་གནས་དང་མེ་ཏོག་རྒྱན་གྱིས་བརྒྱན། །མི་མཇེད་ཞིང་དང་ཁྱད་པར་མི་ཡི་ངོར། །རིམ་བཞིན་རྡོ་རྗེ་སེམས་དཔའ་ཀུན་ཏུ་བཟང་། །གསང་བའི་བདག་པོ་ཀུན་དགའ་བོ་ཞེས་གྲགས། །ཞེས་གསུངས་པ་ལྟར་རོ། །ཁྱད་པར་དུ་གསང་སྔགས་རྡོ་རྗེ་ཐེག་པ་བསྡུས་པའི་ཚུལ་ནི། སྤྱི་རྣམ་ལས་ཇི་སྐད་གསུངས་པའི་དོན་བསྡུས་ནས་ཚུལ་གསུམ་གསལ་རྒྱན་ལས། ཁྱད་པར་སྔགས་ཀྱི་ཚུལ་རྣམས་བསྡུས་པའི་ཚུལ། །འདི་ལ་ལོག་པར་རྟོག་པ་གཞན་ཡོད་ཀྱང་། །