[A:63a]las tha dad du snang bar ston pa yin gyi nges don du tha dad pa ma yin te/ kyai rdo rje'i rtsa rgyud las/ 'chad pa po nga chos kyang nga / /rang gi tshogs ldan nyan pa nga / /zhes gsungs pa ltar ro/ /de lta bu'i bde mchog gi chos rnams ni 'dzam bu gling gi yul nyer bzhi'i dpa' bo dang rnal 'byor ma rnams kyis rtag par nyams su blangs pas 'dzam bu'i gling 'dir mi nub par gnas par bshad de/ de'i rgyu mtshan yang 'dzam bu'i gling las kyi sa pa yin pas/ sngar med pa'i dge mi dge'i las stobs ldan gsar du bskyed du rung bas na/ sangs rgyas kyi lam yang 'dir bskyed du rung ba'i rgyu mtshan gyis yin la/ gling gzhan dag ni 'bras bu'i sa pa yin pas/ sngar gyi las 'bras la longs spyod kyis/ las gsar du mi bsog pas de dag tu rtag par gnas pa yin no/ /yang rnal 'byor ma kun spyod las/ mdor bstan pa yi sprul pa yin/ /rgyas bstan longs spyod rdzogs par brjod/ /slar rgyas bstan pas ma lus nyid/ /mya ngan 'das pa de nyid bstan/ /zhes rtsa rgyud rgyas pa chos sku dang chos mtshungs su gsungs pas sangs rgyas kyi thugs la gnas/ 'bring po longs sku dang chos mtshungs su gsungs pas sems dpa' chen po rnams kyi spyod yul du rgyun mi chad par rtag tu gnas/ bsdus rgyud sprul sku dang chos mtshungs su gsungs pas sprul sku sprul pa ston pa dang / mya ngan las 'da' ba'i tshul ston pa sogs sna tshogs su snang ba ltar/ gdul bya skal ba dang ldan mi ldan gyi ngo bor