[A:71a]bshan pa dag gis glang po che sogs gsod pa'i tshe yan lag sogs la mi brdeg par srog gi rten gang na gnas sar snyug dma'i tshal pa lta bu re bsnun pas myur du 'chi ba bzhin du/ 'di'i gdams ngag gi gnad la mkhas pa'i rnal 'byor pa dag gis rdzogs rim gyi dmigs pa'i gnad gcig la shes pa gtad pas/ dpe'i ye shes sogs ting nge 'dzin myur du skyes pa yin pas so/ /bzhi pa khyad par du 'phags pa de'i lam spyi'i rnam par gzhag pa ni/ grub chen nag po spyod pa'i rdo rjes/ sbyin bya bzhi byin nas blang bya gnyis la bslabs pas/ grogs spyod pa rang don dang gzhan don gnyis kyis 'tshams sbyar te 'bras bu mchog dang thun mong gi dngos grub gnyis thob pa yin no/ /zhes gsungs pa'i sbyin bya bzhi ni dbang bzhi ste/ lam 'di nyams su len par 'dod pas/ 'di nyid kyi dkyil 'khor du dbang bzhis smin par bya dgos te/ mkha' 'gro rgya mtsho las/ rgyud gzhan du ni zhugs pa la/ /tshul 'di bstan par mi bya zhing / /dkyil 'khor gzhan du zhugs pa la/ /'di yi gsang ba bstan mi bya/ /zhes gsungs pas so/ /de ltar smin par byas nas smin pa mi nyams pa'i phyir thun mong dang thun mong ma yin pa'i dam tshig gi tshogs rnams skyong dgos par gsungs pa'i/ thun mong gi dam tshig ni rtsa ltung 'khrul spongs sogs nas gsungs pa'i bla med spyi'i dam tshig rnams yin la/ thun mong ma yin pa ni/ rtsa rgyud las/ lha mo gzhan dang kun sbyor ba/ /'dod la chags pa kun 'gro dang / /mi g.yo ba gzhan gnyis med