[A:138b]'gro 'ongs sogs dus gsum sgrib med du gzigs te/ skal ba dang ldan pa dag la ma 'ongs pa na 'di ltar 'byung gi lung bstan gyi bdud rtsi stsal ba rnams ji lta ba bzhin mngon du gyur pa sogs rtogs pa'i yon tan dpag med mnga'/ lung gi yon tan kyang mdo rgyud bstan bcos thams cad kyi tshig don kun la byang chub pas sde snod rin po che rnam pa gsum dang rgyud sde bzhi nas bshad pa'i rnam dag cho gas sdom pa 'bogs pa'am/ smin byed dbang gi chu rgyun 'bebs pa'am/ grol byed khrid kyis gdams ngag ston pa'am/ mtha' drug tshul bzhi'i rgyud don 'byed pa'am/ snyan rgyud zab mo'i byin rlabs stsol ba la sogs pa gang la yang / tshig gzhan gyis bzung sla zhing rna bar snyan don zab cing nges pa la 'bab/ tshig don gnyis ka 'brel legs pa sogs 'chad pa'i yon tan thams cad tshang zhing / yid chags sdang gi 'chad pa dang / brjod pa mtho dman can sogs 'chad pa'i skyon cung zad tsam kyang mi mnga' bar/ blo chen rnams la zab rgya che/ /blo chung bzung bde go sla ba/ /phyi nas tshig don 'brel chags pa/ /don phra 'gal 'brel dpyod cing bshad/ /ces pa ltar bshad bya gang yin de'i tshig don thams cad zhib tu bshad nas/ mthar de thams cad kyi snying po bsdus pa ni 'di yin no zhes mkhas rmongs kun gyi blo la 'char bde zhing / lag par bzung rgyu yod pa lta bu'i don gyi 'bras bu zhig ston par mdzad pas na 'chad pa'i tshul gang la yang bdag nyid chen po 'di lta bu gzhan la yod pa ma mthong zhing / lhag par thun mong dang thun mong ma