[A:14a]seng ge bzang pos brgyad stong 'grel chen dang / dbyig gnyen gyi mdzod rang 'grel gnyis mthun par/ grangs med gsum zhes pa drang don yin gyi/ nges don du grangs med sum cu rtsa gsum gyi bar du tshogs bsog dgos par gsungs shing / de yang tshogs lam la gcig sbyor lam la gcig sa dang po nas bcu pa'i bar la gsum gsum ste/ byang chub sems dpa'i sa rnams rdzogs nas kun tu 'od sangs rgyas kyi sa bsgrub par bzhed/ slob dpon dul ba'i lhas/ sde pa tha dad bklags par grangs med bcur bshad/ 'phags pa rgya che rol par/ bskal pa grangs med pa bdun du dge ba'i rtsa ba thams cad yang dag par bsgrub pa zhes grangs med bdun du bshad la/ dbu ma pa chos kyi bshes gnyen gyis byang chub sems dpa'i smon lam dang / brtson 'grus la sogs pa'i dbang gis grangs med gsum gyi nges pa med/ ces grangs med gsum las nyung bas chog pa dang / grangs med mtha' yas pa dgos pa yang yod par bzhed pa sogs lugs srol shin tu mang na yang / mkhas pa mang pos bzhed cing thams cad la grags che ba dang / byams pa mgon pos/ sa ni dang po yin par 'dod/ /'di de bskal pa dpag med kyis/ /zhes pa dang / grangs med gsum ni rdzogs pa yis/ /bsgom pa'i lam ni mthar phyin to/ /zhes mthong lam la gcig sgom lam ma dag sa bdun la gcig dag pa sa gsum la gcig ste grangs med gsum gyi bar du tshogs bsags pa 'di nyid gtso bor gzung bar bya'o/ /