[A:18a]ba'i ye shes kyi sku ste sku gsum grub pa las/ dri med de bzhin nyid dang ni/ /mi rtog ye shes ma gtogs pa/ /sangs rgyas rnams kyi chos gzhan ni/ /'ga' yang yod pa ma yin no/ /zhes gsungs so/ /de nyid zag med kyi yon tan dang dbyer mi phyed pa'i dbyings dag pa gnyis ldan mngon du gyur pa'i cha nas ngo bo nyid sku ste/ mngon rtogs rgyan las/ thub pa'i ngo bo nyid sku ni/ /zag pa med pa'i chos gang dag /thob gyur rnam kun rnam dag pa/ /de dag rang bzhin mtshan nyid can/ /zhes so/ /de nyid 'og min chen por rgyal sras 'phags pa rnams la mtshan dang dpe byad kyis brgyan pa'i skur bstan nas theg pa chen po'i chos la rgyun mi chad par longs spyod pa ni longs spyod rdzogs pa'i sku ste/ mtshan ni sum cu rtsa gnyis dang / /dpe byad brgyad cu'i bdag nyid 'di/ /theg chen nye bar longs spyod phyir/ /thub pa'i longs spyod rdzogs skur bzhed/ /ces gsungs pas so/ /de nyid gdul bya mtha' yas pa'i bsam pa dang mthun par rnam 'phrul sna tshogs pas sems can gyi don rgyun mi chad par mdzad pa'i sprul pa'i sku ste/ gang gi srid pa ji srid par/ /'gro la phan pa sna tshogs dag /mnyam du mdzad pa'i sku de ni/ /thub pa'i sprul sku rgyun mi 'chad/ /ces gsungs pas so/ /de lta bu'i chos sku de la dbye na chos can dang chos nyid kyi chos sku'am/ 'dus byas dang / 'dus ma byas kyi chos sku gnyis sam/ ngo bo nyid sku dang / rtogs pa ye shes chos sku gnyis su yod de/