[A:21b]sku'i gnas la dgongs pa yin te/ spyir sprul sku'i gnas de la gdul bya rnams kyi blo gros kyi rim pas 'dzam bu'i gling du sangs rgyas par snang ba dang / gnas gtsang ma'i 'og min tu sangs rgyas par snang ba dang / stong gsum gyi stong chen po'i 'jig rten gyi khams su sangs rgyas par snang ba dang / gzhi dang snying po me tog gi rgyan gyis brgyan pa'i 'jig rten gyi khams kyi sangs rgyas gcig tu gyur par bstan pa sogs gdul bya la snang tshul mang du yod pa las/ byang sems kha cig la gzugs khams kyi 'og min tu sprul pa'i sku de nyid sangs rgyas par snang ba la dgongs nas/ gzugs kyi khams kyi 'og min tu/ /zhes sogs gsungs pa yin par bshad do/ /gsum pa drang don du mdzad pa rnams mdzad pa'i tshul ni/ stug po bkod pa'i mdo las/ sangs rgyas thams cad 'og min du/ /sangs rgyas ma gyur 'dod khams su/ /sangs rgyas mdzad pa mi mdzad do/ /zhes gsungs pas/ thog mar 'og min tu sangs rgyas nas/ gzod 'dod pa'i khams su mdzad pa rnams ston par bshad pa yin zhing / de lta bu'i sangs rgyas kyi mdzad pa la spyir bsam gyis mi khyab kyang / grangs la dga' ba'i gdul bya rnams rjes su bzung ba dang / gtso bo'i mdzad pa nye bar bzung nas/ dus kyi 'khor lo las/ 'di rnams sgrol ba'i slad du sras dang rgyal ba'i bdag po las kyi sar ni rab bzhugs te/ /mngal ni rab tu bzung bar mdzad cing mchog gi thugs rje dag gi byang chub bskyed par mdzad nas ni/ /nyon mongs dang ni bdud rnams bcom