[A:30b]dang sems can gzhan la'ang phan/ /'tsho bde nyams mthun 'chi med 'bras bur 'gyur/ /gsungs shing / de nas byang chub sems dpas nang du log ste bzhugs so/ /rgyal pos de dag mthong thos pas/ bsrung ba'i phyir ra ba dang / 'obs dang / sgo brtan po bcu drug grong khyer gyi bzhi mdor srung ba'i mi bzhag btsun mo rnams glu dbyangs dang rtse dga' byed du bcug de'i tshe byang chub sems dpa' khab nas gshegs pa'i ltas su bya skad mi 'byin/ padma rnyid/ shing la me tog mi 'char/ gling bu dang pi waM sogs rgyud chad/ rdza rnga brdungs kyang skad med par gyur te/ de dag mthong bas rgyal po sems khong du chud cing / sa mtsho ma la sa g.yo ba sogs rmis/ byang chub sems dpa'i rmi lam du/ rkang lag gis rgya mtsho dkrugs/ sa mal char byas/ ri rab sngas su bcug 'od kyis mun pa gsal/ gdugs gcig gis 'jig rten gsum khyab pa la sogs pa rmis so/ /de nas byang chub sems dpas yab kyis ma gnang bar rab tu 'byung bar mi rigs dgongs nas yab kyi drung du song ste/ bdag mngon par 'byung ba'i dus la babs kyi bgegs dang mi dges par ma mdzod cig gsungs pas/ yab kyis/ khyod kyis 'dod pa'i mchog sbyin gyi khab tu bzhugs shig gsungs pa dang / byang chub sems dpa'i rga nad 'chi rgud bzhi med pa 'tshal lo gsungs pas/ yab kyis de sbyin pa'i thabs med/ gzhan gang 'dod pa slongs shig zer ba la/ yang byang chub sems dpas/ rga nad 'chi ba'i 'jigs dang rgud par mi 'gyur ba/ /lha gcig gal te mchog