[A:33a]'dom gang gis brgyan par gyur to/ /de nas byang chub sems dpas bdud las rgyal bar bya ba'i phyir byang chub kyi shing drung du gshegs pas/ lha'i mthus rlung dang char gyi lam chags shing chag chag btab/ ri dang shing dang byis pa btsas ma thag pa thams cad kyang mgo de phyogs su ston cing / stong gsum gyi bdag po tshangs pas rang gi 'khor rnams la do nub byang chub sems dpa' byang chub kyi snying por gshegs kyi mchod pa'i las gyis shig ces bsgos nas mchod pa'i bkod pa bsam gyis mi khyab pa sprul lo/ /byang chub sems dpas 'od bkye ba de phog pa'i sems can thams cad kyi nyon mongs pa dang sdug bsngal thams cad zhi zhing snod kyi skyon thams cad sbyangs so/ /de nas rtswa 'tshong bkra shis la/ bkra shis rtswa 'di nga la myur du byin/ /de ring nga la rtswa yis don chen 'gyur/ /dpung dang bcas pa'i bdud rnams bcom nas su/ /byang chub dam pa zhi ba 'thob par 'gyur/ /zhes gsungs pa dang / des kyang rtswa ku sha sngo 'jam yid du 'ong ba phul ba bzhes te/ byang chub kyi shing la lan gsum bskor te/ rtswa'i rtse mo nang du bstan/ rtsa ba phyir bstan pa la zhal shar du phyogs par bzhugs te/ sku drang por bsrangs nas dgongs pa mngon du bzhag ste/ stan 'dir bdag gi lus 'di skam gyur tam/ /sha rus lpags pa'i tshogs rnams zhig kyang rung / /bskal mang rnyed dka'i byang chub ma thob bar/ /stan 'di la ni lus bskyod mi bya'o/ /zhes yid dam brtan po mdzad pas/ lha rnams kyang byang chub sems dpa' bsrung ba'i phyir phyogs bcur 'khod do/ /de nas