[A:35a]gtor te mchod/ lha'i bu mo rnams kyis bstod/ 'od kyis 'jig rten snang bar byas/ sa rnam pa drug tu g.yos/ phyogs bcu'i sangs rgyas rnams kyis kyang / bdag cag ji ltar sangs rgyas pa/ /de lta kho nar khyod sangs rgyas/ /dper na mar dang mar nyid kyi/ /nying khu mtshungs pa bzhin du gyur/ /ces gsungs shing / nyid kyi gsung gis kyang / bsod nams rnam smin bde zhing sdug bsngal sel/ /bsod nams ldan pa'i mi yi bsam pa 'grub/ /bdud bcom nas ni byang chub mngon sangs rgyas/ /mya ngan 'das shing bsil ba'i dngos po thob/ /ces ched du brjod do/ /zhag bdun phrag dang po la skyil krung ma bshig par byang chub kyi zhing la gzigs/ gnyis pa la stong gsum ring du 'chag gsum pa la byang chub kyi snying po la spyan mi 'dzum par gzigs/ bzhi pa la shar nub kyi bar du rgyang mi ring bar 'chag bdud kyis mya ngan las 'da' bar zhus kyang gdul bya'i don ma zin gyi bar du mya ngan las mi 'da' bar zhal gyis bzhes/ bdud kyi bu mo dga' ma sogs bslur byung ba na rgan mor mdzad/ bdun phrag lnga pa la klu btang bzung ba'i gnas su bzhugs so/ /drug pa la shing nya gro dha skyong du bzhud de/ kun tu rgyu rnams la/ chos thos pa dang mthong ba dang / /dben par dga' ba bde ba yin/ /srog chags 'byung po rnams la gdams/ /gnod pa mi byed 'jig rten bde/ /zhes sogs gsungs/ bdun pa la shing sgrol rgyu'i drung du bzhugs te/ tshong pa ga gon dang bzang pos/ sbrang rtsi