[A:48b]bden pa la 'god pa dang / brgyud pa'i dgos pa gdul bya gang zag tu 'dzin pa las ldog nas 'bras bu bzhi la 'god pa'i phyir du legs par bskor ba yin la/ de ni bka' bden pa bzhi'i chos 'khor te drang don gtso che ba gdul bya nyan thos kyi rigs can la gtso bor gsungs pa yin te/ mdo sde dgongs pa nges 'grel las/ bcom ldan 'das kyis dang por yul wa ra na si drang srong lhung ba ri dwags kyi nags su nyan thos kyi theg pa la yang dag par zhugs pa rnams la 'phags pa'i bden pa bzhi'i rnam pa bstan pas/ chos kyi 'khor lo ngo mtshar rmad du byung ba/ sngon lhar gyur pa'am mir gyur pa sus kyang chos dang mthun par 'jig rten du ma bskor ba zhig rab tu bskor te/ bcom ldan 'das kyis chos kyi 'khor lo bskor ba de yang / bla na mchis pa/ skabs mchis pa/ drang ba'i don/ rtsod pa'i gzhi'i gnas su gyur pa lags la/ zhes gsungs pas so/ /de nas yang yul wa ra na si dang nye ba'i gnas bya rgod phung po'i ri la/ 'khor stong nyis brgya lnga bcu 'am lnga stong gi dge slong dang / dge slong ma dang / dge bsnyen pha ma dang / byang chub sems dpa'i 'khor bye ba phrag khrig brgya stong la sogs pa theg pa chen po'i rigs can rnams la/ chos bka' bar pa mtshan nyid med pa'i chos 'khor te/ chos thams cad ngo bo nyid ma mchis pa las brtsams te/ sher phyin gyi mdo la sogs pa nges don gtso che ba'i mdo rnams so/ /dgos pa gdul bya rnams gang zag dang / chos su lta ba thams cad las ldog nas bgrod pa gcig pa'i lam stong nyid du tshul