[A:181b]khar sgo rum du chos skyong la bka' bsgos shing mchod gtor 'bul ba mdzad pa na/ 'cham mgon gyi zhal nas/ nga yang khyed kyi phyi la 'gro gsungs nas bzhengs byung pa la/ chos rje pas bla gos bsnun te/ ci zer khyed 'dir bsdad nas sde 'di'i bya ra ba bgyis te/ bstan pa yun ring du rgyas dgos so zhes gsungs pas/ bse mgon nyid zhal mdun du cung zad dud pa dang bcas pa sngar bzhin bzhugs par gyur to/ /zhes lo rgyus kyi yi ge rnying ma 'ga' zhig las 'byung ba bzhin bris pa lags/ de lta bu'i thub dbang gnyis pa sa skya paN chen de nyid kyi drung du chos skyong gi chos skor rnams rdzogs par chos rgyal 'phags pas gsan pa yin te/ skyes chen dam pa 'di ni bstan pa snga dar gyi lo tsA ba chen po ka ba dpal brtsegs kyi sku skyer slob dpon chen po padma 'byung gnas kyi lung bstan gsal bo yod cing / spyan ras gzigs dang gsung gleng rtag tu mdzad pa'i se ston ri par grags pa gcig gi sku skyer de ma thag par zhal gyis