[A:8b]bla ma'i tshogs du ma zhig las phyi nang gi chos tshul bsam gyis mi khyab pa zhig gsan cing thugs su tshud par mdzad pas/ gzhan la 'chad pa dang rang nyid nyams su len pa la sogs gang la yang thogs pa med pa'i blo gros mnga' ba zhig ste/ ji skad du/ sgra tshad bzo dang gso ba nang don rig /sdeb sbyor mngon brjod zlos gar tshig gi rgyan/ /rtsis sogs mkhas pa rnams la yongs grags pas/ /rig gnas phal cher gzigs pa tsam gyis dgongs/ /khyad par nyi zla lta bu'i ka tsan gnyis/ /phyi nang gzhan gsum dpal ldan dus 'khor lo/ /zab lam rdo rje'i rnal 'byor la sogs pa'i/ /gtsug lag kun la mi 'jigs spob pa thob/ /ces pa ltar ro/ /de ltar bdag nyid chen po 'dis yongs 'dzin dam pa rnams las phyi nang gi rig gnas kyi bsdus pa'i zab rgyas dam pa'i chos kyi bdud rtsi rnams phyogs dang ris med pa'i gdul bya blo gsal dad 'dun can rnams la 'chad pa gtso bor gyur pa'i mkhas pa'i bya ba rnam pa gsum gyis nyin mtshan khor yug tu 'da' bar mdzad pa'i tshul ni/ ji skad du/ sngon byon mkhas grub mang pos nyer bsten pa'i/ /grangs yas chos kyi khri la mnga' mdzad nas/ /blo gsal mang pos re ba skong mkhas pa'i/ /mgon khyed gangs can bstan pa'i bdag po nyid/ /blo gros lus dkar gangs ri'i rjes 'gro zhing / /gzhung mang 'chad rtsod rtsom pa'i goms stabs can/ /stong phrag mkhas btsun bzang pa'i khyu mchog de/ /gus pas bsten khyod lnga rig paNDi ta/ /chos sgo brgya khri bzhi stong gis mdzes pa'i/ /yongs rdzogs bstan pa'i khang bzang nyams dga' bar/ /