[A:9a]bsnyengs bral thos bsam bsgom pa'i khrir 'khod nas/ /ston pa'i rgyal sa 'dzin khyod 'od srung che/ /phyi rig gling chen bzhi la mnga' bsgyur zhing / /nang rig lhun po'i rtse mor bgrod mkhas pa'i/ /rnal 'byor dbang po rnams dang lhan cig tu/ /zab mo sgrog khyod grub pa'i dbang phyug che/ /yid 'ong mtshan dpe'i ri mo rnam bkra ba'i/ /thub chen rgyal ba'i zhal gyi ltas mo ni/ /skyon bral thugs kyi me long ngos yangs por/ /nges par gzigs khyod sa thob sems dpa' che/ /zhes pa ltar te/ de yang bdag nyid chen po 'dis chos kyi 'khor lo bskor ba'i tshul zhib par ni sus kyang brjod par dka' mod/ 'on kyang mdor bsdus pa tsam ni 'di lta ste/ rje 'dis gdan sa chen po dpal ldan sa skya/ rtse gdong / ngor e waM chos ldan/ na landra/ gling dga' bde ba can/ chos 'khor lha sa/ byang ra sgreng sogs gnas mang por chos kyi 'khor lo ji snyed cig bskor ba'i dus rnams su shes bya'i gnas la ma nor bar dpyod pa'i mkhyen rab kyi 'jug pa rnon pos/ bshad bya'i chos de tshig rna bar snyan zhing / tshig don go bde zhing chod che la/ dka' ba'i gnas rnams dpyis phyin zhing / byed pa gsal ba'i sgo nas so so'i blo dang 'tshams par bshad pas gdul bya rnams kyi blo gros kyi padmo rgyas par mdzad pa na/ nyin rang por chos kyi grwa gnas kyang skyo sun sogs gtan mi skyo ba zhig yin par yongs su grags shing / ji snyed gsungs pa'i rnam grangs kyang / rgyud sde rin po che dri ma med pa rnams nas bshad pa'i spyi'i dbang bskur rdo rje 'phreng ba dkyil 'khor zhe gnyis/ de'i