[A:14b]yin gsungs te/ dpon slob gnyis kas dad pa chen po mdzad pas/ thugs nyams 'phar ba la sogs pa'i rnam 'gyur ci yang mdzad ces grags shing / yang lan cig gi tshe la stod lho'i sa skyong chen po'i spyan gyis gsol ba btab ste zhal gyis bzhes nas/ der phebs pa'i gong rol zhig tu mkha' spyod gzim chung sbug tu bzhugs pa'i skabs cig mtshan lam du rje sa skya pa chen po dang / 'jam pa'i dbyangs yin nam snyam pa'i paNDi ta'i cha lugs byas pa gcig ches rje sa paN/ rnal 'byor gyi dbang phyug bir wa pa/ slob dpon nag po spyod pa ba rnams chos kyi gsung gleng mdzad pa'i drung na bdag nyid chen po 'di phebs te the tshom mang du dpyad/ khyad par nag po spyod pa ba la 'khor lo bde mchog gi chos skor ma lus pa gsan zhing / nag po gzhung drug rdzogs mtshams mnal sad ces grags shing / de nas la stod lhor phebs te der snga dro thugs dam grol mtshams shig rje'i gsung gis/ da nang tho rangs bram ze'i gzugs ral pa'i khrod na seng ldeng gi rdo rje rtse lnga pa yod pa zhig byung ste/ khyed rang gi mi 'phrod yod do zer nas bandhe 'phyar zhags gyon pa gnyis gtad ba'i snang ba byung / phyi na mar bltos shog dang gsungs/ sde pa'i sgo phye 'phral bltar btang pas/ 'bul bsdud pa'i btang ba yin zer ba'i sle'u gyon pa gnyis sgo drung na slob 'dug ces gleng ba byung / de nas yang gdan sa chen por chibs kyi kha lo bsgyur te phebs lam shri rgod tshang du bzhugs nas rgod tshang phug par tshes bcu'i mchod pa mdzad pas/ rje btsun rdo rje rnal 'byor ma 'ja' 'od kyi dkyil na bzhugs pa mngon sum du gzigs/