[A:15a] de nas gdan sar phebs te chos 'chad nyan rgya chen po mdzad pa'i skabs bzhi thog gi gzim chung mkha' spyod sbug tu thugs dam mdzad dus 'khor rnams la/ khyed rnams phyir song / brda ma byung bar la su yang ma gtong gsungs nas thugs dam la sngar bas kyang rgyun ring bar bzhugs pa na/ gzim dpon gyis da nang sku khams nyog pa min lags sam zhus pas/ nyog pa yin/ da nang bde ba can yin zer ba'i zhing khams yid du 'ong ba zhig tu sleb/ rgyal ba 'od dpag med la sangs rgyas byang sems mang pos bskor ba dang / rje sa skya pa yab sras/ rje sangs rgyas rin chen rnams kyang bzhugs 'dug de rnams kyi drung na rin po che khri shin tu mdzes pa gnyis 'dug pa'i/ cung mtho ba mtha' skor du mchod pa'i lha mang pos mchod rdzas thogs nas 'khod pa/ steng na gdugs phub pa zhig 'dug pa der khyod sdod zer nas ngas bsdad/ cung dma' ba der gzhan cig phebs rgyu yin pa'i mtshan don byung ba brjed 'dug gsungs/ nga yod dus khri de stong par yod/ rgyal ba 'od dpag med kyi drung du chos mang po thob/ zhing khams de las yid du 'ong ba mi 'dug gsungs/ nan gyis tshul snang zhus pas gnyis sad pa'i snang ba byung gsungs/ de nas rgyun ha cang mi ring ba zhig na glo bo mkhan chen thams cad mkhyen pa zhing gzhan du gshegs pa'i tshul bstan pa na/ de dus bdag nyid chen po'i gsung las/ kha sing bde ba can gyi zhing na yod pa'i khri stong pa de mkhan chen thams cad mkhyen pa nyid 'byon pa'i ltas su 'dug ces