[A:17a]snying rje'i gzhan dbang gyur pa'i thugs mnga' ba/ /khyod kyi mdzad pa byis blo'i yul las 'das/ /e ma bdag ni tshul 'di mthong bas kyang / /skyon med rnam par thar pa bsam yas kyis/ /mgon khyod gzhan las bzang por bsgrub min te/ /phyogs 'di kho nas spu ldang mchi ma g.yo/ /zhes gsungs pa ltar rtogs par bya'o/ /de ltar mkhas btsun bzang gsum dang ldan pa'i bdag nyid chen de nyid kyi dgung lo bcu gcig nas brtsams te/ bzhi bcu rtsa brgyad pa chu pho 'brug gi lo ma rdzogs kyi bar du bstan pa'i bya ba thos bsam bsgom gsum dang / mkhas pa'i bya ba 'chad rtsod rtsom gsum spel mar mdzad pas thugs shin tu rangs par gyur cing / snyigs ma'i skye bo ngan pa rnams kyi spyod tshul rnams gzigs pas thugs cung zad gdung bar gyur nas/ zhing khams gzhan du gshegs pa la mngon du phyogs par gyur te/ de'i snga ltas su sa g.yo ba dang / nam mkha' la mi shes pa'i skar ma mjug phod can gcig kyang shar zhing / rtsis pa rnams kyis kyang da lo rje 'di la sku dog shin tu che zer ba byung ba na/ kun sems yed yed por gyur te de'i skabs su thams cad mkhyen pa dkon mchog lhun grub kyis rje 'di la/ ding sang mtshan ltas la sogs pa ji ltar byung / phyi lo 'di dgung steng yin pas sku dog bzhin ni med lags sam zhes zhu ba mdzad pa na/ bdag nyid chen po'i gsung gis/ ding sang rmi ltas la