[A:4a]nu'i skabs der nam mkha' la paNDi ta sngo bsang pod ral thogs pa sengge la chibs pa cig gzigs nas/ 'jam dbyangs ya gi na zhes gsungs pa yang byung bar grags te/ de ni bdag nyid chen po paNDi ta nyid mngon sum du gzigs pa ste/ de la sogs pa mdor na bdag nyid chen po 'di ni gzhon nu'i dus nyid nas yon tan gyi tshogs du ma la mnga' mdzad pa zhig ste/ ji skad du/ sku ni mdzes shing yid 'ong mthong na dga'/ /gsung ni 'jam zhing snyan la 'phrod par smra/ /thugs ni chos kyi bag chags bzang pos bgos/ /gzhon nur gyur kyang byis pa'i spyod las 'das/ /de tshe nges pa'i don du 'jam dbyangs nyid/ /gdul bya'i snang ngor sa skya paN chen zhes/ /snyan grags kun gyi gtsug na len pa des/ /rang snang ye shes tshul du gsal bar gzigs/ /zhes gsungs pa ltar ro/ /de nas bdag nyid chen po 'dis rab tu byung nas bstan pa'i bya ba ji ltar mdzad pa'i tshul ni/ ji skad du/ mgon khyed srid pa'i 'ching bas ma gos shing / /'khor ba'i phun tshogs snying po med gzigs kyang / /mchog gi spyod pas 'gro rnams rjes gzung phyir/ /khyim gyi 'ching ba dug can zas bzhin spangs/ /slar yang e waM chos kyi 'jug ngogs cher/ /blo gsal chu bya mang pos mdun bsus te/ /mkhan slob ngang pa'i ded dpon bka' drin las/ /bslab gsum 'o ma'i rgya mtshor rim gyis zhugs/ /zhes pa ltar te/ de yang bdag nyid chen po 'di dgung lo bcu gcig bzhes pa