[A:4b]shing mo yos bu'i lo smin drug zla ba'i dkar phyogs la/ mkhan chen thams cad mkhyen pa bsod nams lhun grub legs pa'i 'byung nags rgyal mtshan dpal bzang po pa'i drung du bstan pa'i rtsa ba dge bsnyen gyi sdom pa rnam par dag pas thugs rgyud bltams shing rab tu byung ba'i brtul zhugs la gnas par mdzad/ gzhan yang mkhan chen thams cad mkhyen pa de la thub pa dgongs gsal gyi bshad bka' sogs chos tshul du ma gsan te/ de nas lo de nyid kyi rgyal gyi zla ba la ngor e waM chos ldan du phebs te/ zla ba de kha'i yar tshes bcu gnyis kyi tshe rje btsun rdo rje 'chang dkon mchog 'phel ba'i drung du mkhan po zhus/ chos rje glo bo mkhan chen pas slob dpon mdzad nas dge tshul gyis sdom pa rnam par dag pa mnos shing / mtshan yang don dang mthun par 'jam dbyangs kun dga' bsod nams grags pa rgyan dpal bzang po zhes bya bar gsol te/ bslab bya'i gnas phra zhing phra ba la yang kha na ma tho ba'i dri mas ma gos pa'i btsun pa'i mchog tu gyur te/ de nas me pho 'brug lo rje de nyid dgung lo bcu gnyis la nye ba tsam na/ mkhan chen chos kyi rje dang dpon slob lhan cig tu dge ba'i bshes gnyen sde snod 'dzin pa du ma'i 'khor dang bcas te gdan sa phyogs su chibs kyi kha lo bsgyur bar mdzad nas rim gyis phebs te/ lo gsar gyi dkar phyogs dga' ba dang po'i tshes la rje btsun 'jam pa'i dbyangs kyi rnam 'phrul chos rje sa skya paNDi ta chen po'i chos kyi khri ga la ba der/ rgyal ba'i sras