[A:3b]chos kun gsal ba'i nyin byed 'di/ /'chad par 'gyur gyi don gnyer dga' bas nyon/ 13 /'dir skal ba dang ldan pa'i skyes bu rnams shin tu rnyed par dka' ba'i dal 'byor gyi mi lus rin po che lan cig tsam thob pa'i dus 'dir/ rang dang pha ma rigs drug gis bsdus pa'i sems can thams cad rnam par grol ba rin po che'i gling du phyin par byed pa'i thabs la dus 'khor mo yug tu 'bad par bya dgos pa yin te/ ji skad du/ mi yi gru la brten nas ni/ /sdug bsngal chu bo che las sgrol/ /gru 'di shin tu rnyed dka' bas/ /rmongs pa dus su gnyid ma log /ces gsungs pas so/ /ji ltar 'bad par bya ba'i tshul yang / chos mngon pa las/ tshul gnas thos dang bsam ldan pas/ /bsgom pa la ni rab tu sbyor/ /zhes gsungs pa ltar thog ma nyid du legs pa'i yon tan thams cad kyi gzhir gyur pa lhag pa tshul khrims kyi bslab pa rin po che la gnas dgos pa yin pa las/ tshul khrims de yang / rgyud rdo rje rtse mo las/ so sor thar dang byang chub sems/ /rig 'dzin rang gi ngo bo 'o/ /zhes dang / bde mchog gi gzhung las/ gong nas gong ma'i sdom pa ni/ /bu khyod kyis ni gzung bya ste/ /grol ba'i rgyu ni de las gzhan/ /thabs ni cung zad yod ma yin/ /zhes gsungs pa ltar gzhi sdom pa gsum thob la ma nyams par byas nas/ de'i 'og tu brgyud pa dri ma med pa las 'ongs pa'i gsung rab rnam par dag pa'i tshig don rnams/ thos pa dang bsam pa dang bsgom pa'i tshul la brtson 'grus dang nan tan snying por bgyid pa'i sgo nas dal 'byor gyi rten lan cig tsam