[A:111b]pos/ log pa'i lam la mtha' med phyir/ /thams cad 'di ni spro bya min/ /zhes gsungs pa ltar log pa'i lam mang du smras pa la'ang dgos pa med par sems so/ /rab tu byung ba thams cad kyis tshogs 'khor gyi dus su sha chang gtan nas bsten mi rung bar 'dod pa yang ma yin te/ rim gnyis kyi ting nge 'dzin la brtan pa thob pa'i sdom brtson rnams kyis ni tshogs kyi 'khor lo'i skabs su sha chang sogs la khyim pa rdo rje 'dzin pa rnams dang khyad med du longs spyad kyang dran shes nyams pa sogs kyi nyes par mi 'gyur yang gzhan ma dad pa sogs kyi rgyur song dogs nas cung zad tsam longs spyod cing / de las gzhan pa'i sdom brtson rnams kyis ni dam tshig gi rdzas ma bsten pa'i nyes pa spong ba'i phyir sha chang sogs cung zad tsam bsten par gsungs shing / mang du bsten par ma gsungs pa'i phyir/ gal te kho na re/ de ltar mi 'thad de/ 'dul ba dang bstun na rab tu byung bas chang sogs cung zad tsam yang bsten par mi rung ba'i phyir dang / tshogs 'khor gyi skabs su rje btsun khu dbon gyis tshim par longs spyod ces gsungs pa dang yang 'gal ba'i phyir/ zhe na skyon med de/ rang nyid kyi lus gso ba'i ched tsam dang / zas la sred pa'i sgo nas longs spyod pa min par/ rang gzhan gyi tshogs rdzogs shing nyes pa rnams sbyang ba'i phyir du lha mchod pa'i bsam pas cung zad longs spyod pa na bcas 'gal gyi nyes par yang mi 'gyur zhing / dam tshig gi rdzas ma bsten pa'i nyes par yang mi 'gyur ba'i phyir dang / rje btsun khu dbon gyis kyang sdom brtson rnams la cung zad tsam